کیپیٹل ڈیولپمنٹ اتھارٹی (سی ڈی اے) ہسپتال میں سنگین بحران، اہم عہدوں کی خالی اسامیاں انتظامی کام کو شدید متاثر کر رہی ہیں۔
سی ڈی اے ہسپتال میں انتظامی بحران شدت اختیار کر چکا ہے۔ 40 اہم عہدوں کی اسامیاں خالی پڑی ہیں، جن میں گریڈ 18 کے 22، گریڈ 19 کے 12 اور گریڈ 20 کے 6 عہدے شامل ہیں۔
ہسپتال ذرائع کے مطابق ان آسامیوں کی خالی رہ جانے کی وجہ سے ہسپتال کے شعبہ جات میں کام کا دباؤ بڑھ گیا ہے، جس سے مریضوں کی سہولت متاثر ہو رہی ہے۔
سینٹ میں وزارت داخلہ کی جانب سے جمع کی گئی رپورٹ کے مطابق ان خالی آسامیوں کو پر کرنے کے لیے ترقیوں اور بھرتیوں کے اقدامات کیے جا رہے ہیں، لیکن یہ تمام عمل ابھی تک ایچ آر ڈی ڈائریکٹوریٹ میں زیرِ غور ہے۔
صورتحال اس بات کی طرف اشارہ کرتی ہے کہ ہسپتال میں جاری انتظامی معاملات کو تیزی سے نمٹانا انتہائی ضروری ہے تاکہ عوامی خدمات میں بہتری آ سکے۔
ہسپتال ذرائع کا کہنا ہے کہ فوری طور پر ان عہدوں کی تعیناتی سے ہسپتال میں انتظامی کام میں بہتری آ سکتی ہے اور مریضوں کو بہتر خدمات فراہم کی جا سکیں گی۔
